Os carnabals ixuplidaus de Laspuña

Ye una pena que ya no se faigan en Laspuña os carnabals como en otros tiempos y que os presonaches  que podeban beyese por as carreras en a decada d'os cuarenta y a meta d'os zincuenta ya son enterraus en a memoria d'os más biellos do lugar. 
O mio pai (n.1933) y a mia mai (n.1939) encara s'alcuerdan d'ixos carnabals.

Señas Politas. Mullers casadas que se meteban en as sayas unas zintas de colors y en a punta un güego vaziau (vuedo).  Feban un baile que consistiba en chirar sobre ellas mesmas formando un redol, cantaban una letra y se daban o pase pa entrecruzase de dos en dos por o zentro a ritmo d'una mosica rapida  pa que se debantasen as zintas y en rematar o baile, a que teneba más güegos con a closca sin rompese yera a Seña Polita d’ixe carnabal.
Ista história d'as Señas Politas me la contó Seña Asunzion de Casa Cazcarra Barrialto, y abaixando a voz me dizio que dimpues da guerra no l'es ne deixon bailar ni cantar pues o mosén y l'alcalde seño Pepe de Inazio no quereban tener problemas con l'autoridad ya que a letra yera "picante",se reiba al dezime "tu yes chobenent Betate".  M'alcuerdo que me cantó una parte  da letra que deziba asinas " En a noche de bodas yo no llevaré corsé y tu ya sabes porqué, pa que, pa que, pa que".
Quedamos en que tornaria a pasar un altro día pa apunta-la... y ya no pude fer-lo.
A mia goleta de Casa Molinero me contó que no todas as mullers s'atrebeban a fer o baile ya que no yera bien visto y que de normal  as mullers  casadas de poco tiempo no lo bailaban.

Afullinaus (Normalmente yeran os mozos pero tamién as mozas rebestidas d'ombre) Con a cara afullinada gambiaban por as carreras con una sarten con o culo pleno de fullin y de manteca ,grasa u azeite y se dedicaban a untales a cara a la chent con ixe tizne.

Zenisosas-sos (Lo feban as mozas, tamien os mozos chobenets ) . Saliban con morrales colgaus a bandolera en o güembro plenos de zenisa y con bufadores feitos de caña enzenisaban as capezas da chent

Golé-Goleta- Pasaban por as casas con a cara enmascarada u tapada con un moquero replegando güegos y trunfas pa fer lifara en o baile. Si en bella casa los reconozeban  no les daban cosa, asinas que los prevocaban pa felos charrar y los convidadan a beber vin en o porrón pa prebar de beyeles a cara. En as zagueras piezas do baile, como ya yeran fartos de vin, repartiban garrotazos en as canillas  a las parellas que s´achuntaban más d'a cuenta.

Onsos, no iban a o baile. Nomás correban por as carreras en o claro do diya pa espantar a os ninons y ninonas. Os onsos teneban a cara untada con follin y se la tapaban con un moquero con foraus pa os güellos, se meteban sayas y piezas de ropa p'aparentar más grandizos, se tapaban a capeza y a lomera con una cuera (pelliza) en as mans llevaban tochos o ramas de buixo que paixeban zarpas con uñates pa esgarriñar.

Pa espantar a os chicorrons  y felos correr, braziaban y chilaban como os onsos.

Cañamo.As mullers casadas (As Señas) Con o cáñamo feban una trenza de mecha  y pretando-le fuego enrestiban a os maziellos biellos y chobens pa sumarrales as culeras, pero si sàlcuentraban en o camín a bel pobre mesache... ya podeba eslampar pues no preguntaban si yera casau . 

Cheringas. Os chobens  y tamien bel maziello feban cheringas de caña y aguardaban en as cantonadas foscas a que pasasen as mullers casadas con as mechas pa asinas enchupirlas  y ferlas tornar ta casa a mudase pa quitase a mojadura (en febrero chela y no podebas ir mullau si no querebas enganchar un enfriamiento).